A Unidade de Policía Nacional Adscrita de Galicia (UPA), en colaboración coa Confraría de Pescadores de Cabo de Cruz, comisou 31,40 quilos de ameixa e berberecho, así como diverso material empregado para o furtivismo, no marco dun operativo conxunto de prevención levado a cabo o pasado 18 de decembro nas praias do concello coruñés de Boiro.
Como resultado da actuación, os axentes identificaron nove persoas, inspeccionaron un vehículo e tramitaron un total de 13 actas de sanción. Oito delas foron por infracción da Lei de Pesca de Galicia, mentres que as cinco restantes corresponderon a infraccións da Lei Orgánica 4/2015 de protección da seguridade cidadá.
O marisco incautado foi devolto ao seu medio natural e resementado no mesmo lugar no que fora extraído, seguindo os protocolos establecidos para garantir a conservación dos recursos mariños.
Este operativo enmárcase no reforzo dos dispositivos impulsados pola Unidade de Policía Adscrita, en colaboración coa Consellería do Mar e as confrarías de pescadores, para intensificar a loita contra o furtivismo e protexer os recursos mariños afectados por esta práctica ilegal. Os controis céntranse tanto en impedir a extracción ilegal como na venda, transporte e distribución do produto sen as debidas garantías sanitarias.
