A Consellería do Mar acordou esta tarde a apertura da campaña da vieira na ría de Arousa de xeito limitado e estritamente controlado, atendendo aos criterios científicos e tras un proceso de diálogo e consenso co sector. A extracción autorízase unicamente na zona IV da ría.
A decisión foi adoptada nun encontro no que participou a directora xeral de Desenvolvemento Pesqueiro, Ángeles V. Suárez, xunto con representantes das confrarías de pescadores de Cambados e Rianxo, así como cos presidentes das federacións provinciais de confrarías de Pontevedra e A Coruña. Ambas confrarías solicitaron formalmente a apertura da campaña, petición que foi analizada á luz da información científica dispoñible e da situación real do recurso.
Como resultado deste proceso, a Consellería do Mar autoriza a extracción de vieira os días 17, 18 e 19 de decembro, cun límite máximo total de 7.500 quilos. Deste volume, 3.000 quilos corresponderán á confraría de Rianxo e 4.500 á de Cambados, establecéndose ademais un tope de 40 quilos por persoa e día.
A actividade quedará restrinxida á zona IV da ría de Arousa e os únicos puntos de descarga autorizados serán os portos de Tragove e Rianxo, co obxectivo de garantir un control efectivo tanto da extracción como da posterior comercialización do produto.
Esta decisión baséase no informe científico elaborado polo Centro de Investigacións Mariñas (CIMA), que conclúe que non existe stock suficiente no resto das zonas da ría, polo que recomenda unha extracción puntual, limitada e rigorosamente controlada para asegurar a sustentabilidade do recurso.
A directora xeral de Desenvolvemento Pesqueiro salientou que esta medida responde a un modelo de cogobernanza da xestión pesqueira, no que Xunta e sector traballan de maneira coordinada para compatibilizar a conservación dos recursos coa actividade económica. Neste sentido, subliñou que a decisión adoptada equilibra criterios biolóxicos, sociais e económicos, garantindo a protección da especie e ofrecendo ao sector unha oportunidade responsable nunha campaña marcada pola prudencia.
