As máis reiteradas tiveron que ver coa circulación en estradas, como a caída de árbores ou pólas nelas (89), ou cables e postes (25). O 112 Galicia tamén rexistrou numerosas intervencións de prevención de risco, acadándose as 37.
Desde o comezo do día de onte, as provincias de Pontevedra e da Coruña foron as máis castigadas polo temporal, con 92 e 74 sucesos relacionados coa climatoloxía adversa, respectivamente. Namentres, Lugo chegou ata 39 e Ourense 20.
Nas últimas horas non se produciron incidentes de gravidade relacionados cos efectos do temporal. Igualmente, cómpre mencionar o derrubamento dun muro en Petelos (Mos) que cortou a circulación por unha vía, así como a caída dunha árbore sobre unha casa en Cedeira (Redondela), o que causou danos materiais. En ningún dos dous casos houbo xente afectada.
Precisamente na provincia de Pontevedra é onde atopamos os concellos con maior número de incidencias, como son Vigo (20) e Vilagarcía de Arousa (12). Os seguintes serían Ribeira (8) e o concello de Lugo (7).
Cómpre mencionar que, aínda que xa se deu por finalizada a alerta laranxa na costa, continúan activos outros avisos na comunidade galega, polo que é preciso extremar a precaución. Ademais, mantense activo o Plan Inungal, con varias estacións baixo observación: Castro-Cee, Cabeiro-Redondela, Vigo-Eifonso, Miñor-Gondomar, Gallo-Umia-Cuntis e Lérez.
