Un incendio declarado na mañá deste martes nun silo situado na parroquia de Miñortos, no concello de Porto do Son, quedou finalmente sufocado sen que se rexistrasen danos persoais.
Segundo informou o 112 Galicia, o aviso recibíuse pasadas as 8:30 horas, cando un particular alertou de que algo estaba a arder nun silo situado xunto a unha nave na zona da Amoreira.
De inmediato, o servizo de emerxencias mobilizou aos Bombeiros de Boiro e Ribeira, ao GES de Noia, á Garda Civil e á Policía Local de Porto do Son.
Os equipos de intervención lograron controlar e confinar o lume, que afectou a unha tremoia con serraduras e ao contido do silo. Finalmente, o incendio foi sufocado sen que se producisen feridos nin danos de maior consideración.
