Rianxo celebrou o 25N (Día Internacional para a Eliminación da Violencia de Xénero) a través de diferentes frontes de actividade e loita colectiva. No centro de día de AGADEA as persoas usuarias uníronse contra a violencia machista desde a a memoria e a forza compartida, elaborando un mural reivindicativo, letra a letra, cor a cor, lembrando que a violencia de xénero non é só unha cifra: é unha ferida social que debemos erradicar entre todas e todos.
Ademais, un dos puntos máis reivindicativos de Rianxo foi o Campo de Arriba, onde foi habilitado o Tendal da vergoña e onde se leu o manifesto institucional ás 20.00 horas, acompañado de música de pandeireteiras rianxeiras entoando xuntas a Canción sen medo da cantautora mexicana Vivir Quintana.
Destacar tamén a proxección, no Auditorio, do documental O próximo baile será contigo, unha ollada en primeira persoa á forza do apoio mutuo entre as mulleres, á loita fronte á violencia institucional e á dor da ausencia.
Sinalar tamén que até o 30 de novembro estarán expostas as pancartas de Irmandiñas Púrpuras no segundo andar do Auditorio de Rianxo.
Tamén están colgadas na balaustrada do Pavillón Municipal José Manuel Abuín “Chema” as bufandas contra a violencia elaboradas por Ondiñas Mainas.
