O Grupo Municipal Socialista de Rianxo emitiu un comunicado no que denuncia “a nova semana de peche da Biblioteca Municipal, un servizo que leva tempo sen continuidade nin estabilidade, xerando un crecente malestar entre os veciños e veciñas”, sinalan, engadindo que a biblioteca “debera ser un espazo fundamental para o acceso á cultura, pero permanece pechada de maneira intermitente, e dende hai meses non se permite a retirada de novos libros, limitándose unicamente á devolución daqueles exemplares recollidos hai tempo”.
Esta situación, di o PSOE local a través do seu voceiro Óscar Rial, “evidencia un servizo desmantelado, afastado da súa función educativa e social”.
Desde o PSOE de Rianxo considérase que “esta falta de estabilidade reflicte a escasa preocupación do Goberno local polo fomento da lectura, un ámbito esencial para o desenvolvemento cultural e persoal da cidadanía”.
Lembran tamén que o rexedor comprometeuse “publicamente” a “inaugurar a nova biblioteca en decembro de 2024, un prazo que, a día de hoxe, se ve cada vez máis inverosímil”.
Engaden que “mentres se privatizan servizos municipais, outros tan importantes como a biblioteca se deixan caer nun abandono progresivo, nun momento en que a lectura debería ser un refuxio e unha ferramenta de igualdade nunha sociedade cada vez máis dixitalizada”.
O PSOE de Rianxo insiste en que “é urxente recuperar a normalidade do servizo, garantir a súa apertura estable e poñer en marcha un plan de dinamización lectora municipal que devolva á biblioteca o papel que merece: un espazo vivo, de encontro, aprendizaxe e participación”.
