O pleno da Corporación local de Rianxo aprobou a semana pasada (cos votos a favor de Rianxo en Común, do Partido Popular e do BNG) o proxecto técnico para a construción do centro de día nas dependencias do Pazo de Rianxiño, en palabras do rexedor, Julián Bustelo, “un recurso sociosanitario fundamental para o que vimos traballando dende o primeiro segundo da lexislatura e que cada vez está máis preto”.
As actuacións a levar a cabo consisten fundamentalmente en dotar o espazo anexo ao edificio histórico dunha nova distribución, con espazos mellor iluminados e accesíbeis. Contará con 360 metros cadrados de superficie útil e con todas as prestacións necesarias para a posta en funcionamento do servizo.
Amais, aprobouse no pleno a solicitude de co-financiamento á Deputación de Coruña para facerlle fronte a este proxecto, o cal require dun investimento lixeiramente superior aos 170.000€.
O proxecto foi redactado co asesoramento de persoal experto neste tipo de equipamentos e sinalou que o proxecto xa obtivo a autorización da Dirección Xeral do Patrimonio Cultural.
