Esta fin de semana rematan as sesións da II Mostra de Teatro de Porto do Son. Farano da man de Malasombra Producións, que representa este sábado 29 de novembro, na Casa da Cultura de Porto do Son a partir das 21.00 horas, o espectáculo D.E.P. Unha comedia de morte. As persoas interesadas poderán mercar as entradas (4€) na Oficina de Cultura ata o venres, en horario de 8:00 a 15:00 h. Tamén se poderán adquirir no momento previo á función.
A actividade forma parte da programación de Cultura da Deputación da Coruña.
D.E.P. é unha trepidante comedia na que se ensina con moito humor o egoísmo, a mentira e o engano entre irmáns ante a repartición dunha herdanza. Uns seres humanos que nos amosan o lado máis cruel, ante a disputa de bens materiais: “Que mamá morra axiña por favor! “.
D.E.P. amosa un contexto ben recoñecíbel polo espectador: a pelexa pola herdanza. Pero aínda hai algo que a fai moito máis singular e é que neste caso, a herdanza é dunha nai que aínda non está morta.
Axenda ao completo.
A axenda da II Mostra de Teatro comezou o 18 de outubro con Vicio houbo sempre, unha peza de narración oral protagonizada por Atenea García, que recolle historias reais de mulleres maiores de 80 anos sobre o desexo, o pracer e a vida.
O 25 de outubro foi a quenda de Golpes, da compañía aAntena, centrada na historia de Pamela e a aprendizaxe dunha relación que non debía vivir. O 1 de novembro, Gallaecia Eventos presentou Cabaré Climático, e o 8 de novembro, foi a quenda de Máis saaabor!
O 15 de novembro, Talía Teatro representou Un deus salvaxe.
Este 22 de novembro o grupo local Mimarte presentou Nais en apuros.
A clausura será o 29 de novembro coa comedia D.E.P, de Malasombra.
