No marco da completa e exhaustiva programación organizada polo Concello de Rianxo para celebrar ao grande o 75 aniversario do falecemento de Alfonso D. Rodríguez Castelao, o vindeiro sábado veciños e visitantes poderán desfrutar da representación de Castelao, un corazón á intemperie por Fantoches Baj, Será no Auditorio de Rianxo a partir das 12:00 horas. Trátase dunha peza para nenos e nenas a partir de 6 anos. A entrada será de balde até completar a capacidade do auditorio. Máis información na web municipal.
Sinopse
Castelao, un corazón á intemperie é a nova produción de Fantoches Baj para público infantil e familiar, unha proposta de narración oral, monicreques, música tradicional e teatro de máscaras que busca dar a coñecer ao artista e escritor rianxeiro entre os nenas e os nenos, reler e interpretar parte da súa obra e poñer en valor o galego.
Após a morte de Castelao o 7 de xaneiro de 1950, nun tempo no que en Galicia non era posíbel chorar a súa perda, o dramaturgo e director de escena Daniel Varela Buxán decide render, nun acto privado diante da súa veciñanza, a súa particular homenaxe ao rianxeiro.
Varela Buxán fora o encargado de dirixir Os vellos non deben de namorarse na súa estrea absoluta en 1941 en Bos Aires e, a partires de aí, mantivo unha fonda amizade con Castelao. Por iso, para homenaxealo, Varela Buxán colocarase nun pequeno escenario onde trazará brevemente a peripecia vital de Castelao deténdose naqueles momentos literarios e artísticos que considera máis significativos. Entre outros, representará con marionetas parte da súa obra: contos de Cousas (Panchito e a Marquesiña); narracións de Retrincos (Sabela e O inglés), escenas de Os vellos non deben namorarse e o monólogo do esqueleto en Un ollo de vidro.
