Unha persoa perdeu a vida esta madrugada tras colidir o vehículo que conducía contra un cabalo que se atopaba na vía, ao seu paso pola parroquia de Baroña, no concello de Porto do Son.
O accidente produciuse na estrada AC-550, á altura do quilómetro 92, arredor das 00:00 horas, segundo informou o 112 Galicia. O servizo de emerxencias tivo constancia do sinistro a través da alerta emitida polo sistema de chamada automática de emerxencia do vehículo (eCall), aínda que non foi posible establecer contacto coa persoa ocupante.
Pouco despois, varios particulares chamaron ao 112 para informar dun coche accidentado que colidira cun cabalo, o cal falecera no impacto. As testemuñas advertían tamén de que o condutor podería estar atrapado e sen vida.
De inmediato, o 112 activou un amplo operativo de emerxencias no que participaron profesionais do Servizo de Urxencias Sanitarias de Galicia-061, os Bombeiros de Ribeira e de Boiro, o GES de Noia, así como axentes da Garda Civil de Tráfico e da Policía Local de Porto do Son.
Unha vez no punto, os equipos de intervención confirmaron o falecemento do condutor e indicaron que foi necesario empregar material de excarceración para liberar o corpo da vítima.
