A palestina Hanan Kaoud, concelleira de Ramala (Cisxordania) e experta en xénero, estará en Muros na tarde deste mércores 12 de novembro. A visita forma parte dunha actividade do Fondo Galego de Cooperación e Solidariedade, do que o Concello de Muros forma parte. Ás 17:00h no Local Social de Sorribos (Abelleira) celebrarase unha charla-café con Hanan Kaoud, baixo o titulo Visita ao norte. A voz resiliente das mulleres palestinas, no que conversará con todas as persoas asistentes.
Previamente, hoxe pola mañá, a activista e política palestina estivo en Compostela, onde salientou a situación en Cisxordania, “que non é tan diferente do que acontece en Gaza e que debemos poñer tamén sobre a mesa”. Explicou que o pobo palestino sofre bombardeos pero tamén as consecuencias do uso de armas químicas “que afectan á capacidade reprodutiva das mulleres e provocan máis discapacidades”; e denunciou que se están incrementando tamén as violacións de mulleres palestinas. Hanan Kaoud agradeceu a oportunidade que brinda o Fondo Galego de Cooperación e Solidariedade “de seguir expandindo a solidariedade con Palestina e presionando ao goberno de Israel para que cese o xenocidio”.
