A Casa da Cultura de Outes acolle a exposición de fotografías titulada Acérquese de Gabriela Garza-Lainez, do 14 de novembro ao 14 de xaneiro, en horario de mañá de 09:00 a 14:00 horas e de tarde 17:00 a 20:00 horas de luns a venres e os sábados de 11:00 a 13:00 horas.
A mostra conta con 18 fotografías de algúns dos familiares e amigos de Gabriela, destacando aquelas persoas que teñen un impacto significativo nas súas vidas, valorando dentro destes, aqueles recordos que permaneceran ao longo da vida.
A maioría das fotografías son do 2018 e están feitas con película diapositiva de 35 mm. Grande parte delas son a cor, agás 5 que están en branco e negro. Destaca unha fotografía A Miguel feita en 2025 en impresión dixital.
Todos estes retratos íntimos tomados en diferentes países van acompañados dun poema. Textos que orixinariamente están escritos en inglés. Na mostra podemos adentrarnos neste mundo lírico que foi traducido ao español. En cada un destes poemas aparecen sentimentos ou características de cada unha das persoas ou imaxes.
Gabriela Garza-Lainez é unha artista que busca compartir a súa vida multidimensional cos demais. Naceu en Estados Unidos, pero tamén medrou como nómade global, influenciada por países como El Salvador, México, Alemania, China, Australia, Malasia, Francia e España. Recibiu a súa licenciatura en Produción de Cine e Televisión na Universidade Loyola Marymount en Los Ángeles, California, e recibiu a súa mestría en Deseño Multimedia na Universidade Monash en Melbourne, Australia.
A partir dos seus estudos, creou a exposición Acérquese. Despois de exhibir por primeira vez estas fotografías en Penang, Malasia, con Little Art House Studios, agora regresa cos poemas traducidos do inglés ao español. Acérquese explora e destaca ás persoas que teñen un impacto pequeno ou significativo nas nosas vidas, valorando “aquelas coas que compartimos breves recordos e que permanecerán con nós polo resto das nosas vidas”.
