UCIN Galicia emitiu un comunicado no que esixe á Xunta a retirada inmediata do recorte de liñas de autobús entre Santiago e o Barbanza. A agrupación ualifica a medida de “ataque frontal á mobilidade da veciñanza”. Esta medida, din, “lonxe de mellorar a mobilidade, afonda na marxinación do rural e precariza o acceso aos servizos esenciais para milleiros de galegos e galegas”.
Localidades directamente afectadas
UCIN lembra que segundo a proposta feita pública pola Xunta, perderían conexión directa con Santiago parroquias como Araño, Leiro, Isorna e Asados (Rianxo), mentres que o número de frecuencias reduciríase en máis dun 80 % en moitos casos. I”sto supón, na práctica, deixar sen alternativas reais de transporte a persoas maiores, estudantes, traballadores e familias enteiras”.
Declaracións de José Luis Calo, Coordinador de UCIN Galicia:
“É absolutamente inadmisíbel que en pleno 2025 a Xunta aposte por recortar liñas de autobús en lugar de reforzalas. Esta decisión non é unha reorganización, é unha amputación do transporte público no rural galego. Non o imos permitir. UCIN Galicia estará do lado da veciñanza afectada e lideraremos, se é necesario, mobilizacións para frear este despropósito. Estanse a condenar parroquias enteiras ao illamento. Mentres se enche a boca falando de loita contra o despoboamento, a realidade é que se seguen recortando dereitos fundamentais no rural. O acceso ao transporte público é unha necesidade básica, non un luxo.”
Demandas de UCIN Galicia
Desde UCIN Galicia esixen á Xunta de Galicia:
-A retirada inmediata do proxecto de reordenación das liñas de autobús no Barbanza.
-A inclusión real da cidadanía no proceso de planificación, abrindo mesas de diálogo cos concellos, asociacións veciñais e usuarios.
-Un plan de mobilidade público, inclusivo e adaptado á realidade do rural galego.
-Máis autobuses e máis frecuencias, especialmente en parroquias e núcleos rurais.
UCIN Galicia, coas plataformas veciñais
A agrupación súmase deste xeito ás iniciativas da veciñanza, como a recollida de sinaturas promovida pola Asociación Leoira en Rianxo, e “apoiamos todas as alegacións e protestas que se leven a cabo para defender o dereito á mobilidade e á dignidade dos nosos pobos”. Engaden que “Galicia non se defende dende un despacho en San Caetano, deféndese na estrada, nos autobuses, nos colexios e nos hospitais”.
