José Luis Calo, coordinador de UCIN Galicia, advertiu nun comunicado sobre “manobras organizadas contra o proxecto político da formación no ámbito municipal”. Explicou que “desde UCIN Galicia queremos denunciar publicamente a aparición e difusión de perfís falsos en redes sociais que teñen como finalidade clara o ataque e a desacreditación do noso grupo político, nun intento de obstaculizar o noso traballo e minar a nosa credibilidade ante a cidadanía”.
Explicou que estas prácticas, que xa tiveron lugar durante as eleccións municipais de 2023, repítense agora “con maior intensidade e planificación, o que evidencia unha estratexia dirixida a impedir que proxectos políticos limpos e afastados dos intereses dos grandes partidos poidan avanzar con liberdade”.
“Estamos a sufrir ataques sistemáticos dende o anonimato, a través de contas falsas que difunden mentiras e insultos coa intención de silenciarnos. Non o van conseguir. A cidadanía merece políticos que falen claro e loiten pola transparencia, non campañas de difamación propias doutras épocas”, declarou José Luis Calo, coordinador de UCIN Galicia.
Sinalou que UCIN Galicia rexeita con contundencia os seguintes puntos:
-A utilización de identidades falsas para atacar a representantes políticos lexítimos.
-O uso de ferramentas dixitais para sementar odio, manipular a opinión pública ou intoxicar o debate democrático.
-A permisividade institucional ante prácticas que poñen en risco a saúde democrática da vida municipal.
Accións legais en estudo
UCIN Galicia está a recoller información e evidencias sobre estes feitos e valora presentar as correspondentes denuncias penais por inxurias e calumnias (art. 208 e seguintes do Código Penal) e por suplantación de identidade (art. 401), delitos contra a honra e a intimidade, entre outros posíbeis tipos delituosos. Así mesmo, estudaranse accións civís por danos morais causados pola difusión de contidos falsos ou ofensivos, e instarase ás autoridades competentes a investigar a orixe destes perfís e o posible uso de recursos públicos ou institucionais na súa difusión.
Chamamento á cidadanía
“Facemos un chamamento á cidadanía a manter unha actitude crítica fronte a este tipo de prácticas e a non contribuír á súa difusión. A política debe centrarse no debate limpo, nas propostas e no ben común, non no acoso nin na mentira”, sinalaron dende UCIN Galicia, engadindo que “seguiremos traballando con firmeza por unha política municipal transparente, limpa e afastada das dinámicas caciquís que durante anos dominaron a vida institucional en moitos concellos”.
