O Grupo Municipal Socialista de Rianxo anunciou que presentará no pleno da Corporación varias iniciativas orientadas a mellorar o benestar da veciñanza, impulsar o desenvolvemento urbanístico e garantir instalacións deportivas seguras e de calidade. O PSOE de Rianxo reclama actuacións urxentes no Campo de Fútbol de Vilas, onde, sinalan, “o deterioro da herba sintética impide o uso en boas condicións e supón un risco para as persoas usuarias”. E engaden: “Este espazo é fundamental para a vida social e deportiva do municipio, xa que acolle cada semana a centos de familias e rapaces que participan en actividades deportivas e formativas”. Para o PSOE local, “a mellora do campo é unha cuestión de seguridade, pero tamén de compromiso co deporte base e coa convivencia comunitaria”.
Así mesmo, os socialistas propoñen unha avaliación técnica do Campo da Lomba, co obxectivo de “planificar con responsabilidade o seu mantemento e substitución futura, asegurando que as instalacións deportivas de Rianxo manteñan un estándar de calidade axeitado ao uso que reciben”.
En materia urbanística, o grupo propón modificar a ordenanza que regula a parcela Z1, eliminando a obriga de reservar o 20% das vivendas como protección oficial. “Esta medida”, din, “busca ofrecer seguridade xurídica aos propietarios, facilitar o avance do planeamento e abrir novas oportunidades para o desenvolvemento de vivenda no municipio”.
O Grupo Socialista tamén pon o foco “na situación fiscal de moitos veciños e veciñas que viron incrementado o IBI ata nun 300%, mesmo sen realizar melloras nas súas vivendas”, avanzan, engadindo que “solicitamos explicacións públicas sobre o convenio que o Concello asinou coa Dirección Xeral do Catastro no marco do programa PLACO, para aclarar as causas destas subas e garantir que se actúe con transparencia e xustiza social”. Ademais, consideran “necesario” unificar criterios nas achegas veciñais ás obras de saneamento e abastecemento, “evitando desigualdades que non teñen xustificación técnica”.
O Grupo Municipal Socialista reitera o seu “compromiso de seguir transformando as demandas da veciñanza en propostas útiles e reais para mellorar o día a día en Rianxo”.
