O conselleiro de Sanidade, Antonio Gómez Caamaño, avanzouque os Orzamentos da Xunta para o vindeiro ano recollen unha partida de 460.000 euros para poñer en marcha no Hospital de Barbanza unha nova ambulancia medicalizada ao servizo desta comarca.
O titular da carteira sanitaria da Xunta, acompañado polo xerente da área sanitaria de Santiago de Compostela e Barbanza, Ángel Facio, realizou unha visita ao Hospital Público de Barbanza, para estar co director do distrito sanitario, Hugo Pérez, e intercambiar impresións cos responsábeis médicos e a xunta de persoal.
O conselleiro dixo que “o compromiso do Goberno galego é firme con este hospital e esta comarca, posto que os orzamentos da Xunta para 2026 destinan máis de 900 millóns de euros para a área sanitaria de Santiago de Compostela e Barbanza, o que supón un incremento do 7,3 % con respecto ao 2025, permitindo atender varias demandas e reforzando a capacidade do hospital para continuar a ofrecer unha atención sanitaria de máxima calidade”.
Gómez Caamaño apuntou que “o vindeiro ano a Xunta porá en marcha o proxecto para crear neste centro da rede do SERGAS un hospital de día oncohematolóxico, co propósito de evitar que os pacientes de cancro desta comarca teñan que desprazarse a Santiago para as consultas máis rutineiras e para recibir os tratamentos máis sinxelos”.
O conselleiro explicou que o seu departamento “xa conta cun plan funcional, e que xa está reservado o espazo para que, antes de que remate este ano, se licite a redacción do proxecto para que o hospital de día comece a coller forma no 2026”.
Para redactar o proxecto, a Xunta destinará ao redor de 100.000 euros aos que se engadirán outros 1,5 millóns de euros para a realización das obras.
Anunciou ademais que a Xunta tamén acometerá outra actuación “moi necesaria neste hospital”, como “é a mellora da eficiencia enerxética a través da renovación das envolventes do edificio, obra á que a Xunta destinará un millón de euros”.
Así mesmo, anunciou que a Xunta adquirirá un novo mamógrafo por medio dun investimento de máis de 326.000 euros, unha vez que cumpriu o compromiso de dotar un novo ecógrafo, estando xa adxudicado.
