O Concello de Muros xa comezou as obras de saneamento na marxe dereita de Serres, que contan cun orzamento de 170.609,14 euros. “Trátase”, sinalaron a alcaldesa María Lago e a concelleira de Obras, Laura Rivadeneira, “doutro paso máis no noso obxectivo de mellorar o saneamento en Muros, levando o servizo a zonas que carecían del e mellorando a rede existente”.
“É un servizo prioritario que repercute ademais nunha actividade moi importante no noso concello, como é o marisqueo”, engadiu a rexedora.
Pola súa banda, Rivadeneira lembrou que “tamén comezarán nas próximas datas os traballos de saneamento de Ribeira do Maio (250.000 euros) e unha actuación para o saneamento e a renovación do pavimento da rúa Real (238.300 euros)”.
Cando chegou ao Goberno local no verán do ano 2023, María Lago fixouse entre as súas principais prioridades o saneamento no concello: “A día de hoxe, o investimento na rede neste mandato xa supera os 1,5 millóns de euros e as actuacións continuarán nos próximos meses”, sinalou.
