Muros renovou os días pasados a Bandeira Verde polas súas boas prácticas medioambientais e, con motivo de distinción da Xunta (que tamén recibiron Boiro, Carnota, Porto do Son, Ribeira e A Illa), o Concello aproveitou para facer balance das súas iniciativas recentes a prol do medio natural.
“No caso de Muros, presentamos máis de 40 actividades e actuacións”, explica a alcaldesa de Muros, María Lago, responsábel tamén da área municipal de Medio Ambiente, salientando o feito que os concellos interesados en obter esta importante distinción deben notificar á Xunta un mínimo de seis actividades ou actuacións nos últimos catro anos relacionadas coa protección medioambiental.
“É unha tarefa conxunta coidar o patrimonio natural de Muros, pero desde o concello temos a obriga e a responsabilidade de liderar e impulsar estas actividades”, engade.
Nos últimos dous anos, desde o Concello priorizáronse as actuacións de mellora da rede de saneamento; a renovación do punto limpo e o reforzo do punto limpo móbil; o reparto de composteiros para a veciñanza; as campañas de limpeza das praias, ou as xornadas de eliminación de flora exótica invasora, entre outras iniciativas.
Ademais, María Lago lembrou que “aumentaron tamén as actividades de formación nos centros educativos, “poñendo en valor entre os nenos e a mocidade a educación ambiental como ferramenta para xerar conciencia e accionar cambios en prol do medio ambiente”, remata a alcaldesa de Muros.
