Un total de 33 municipios galegos, entre eles Boiro, Carnota, Muros, Porto do Son e Ribeira, conseguiron as Bandeiras Verdes de Galicia 2025, un selo da Xunta que distingue o esforzo local pola paisaxe, a eficiencia enerxética, a educación ambiental e a xestión responsable dos recursos. Na outra beira da ría a Illa de Arousa está tamén entre os que recibiron o galardón,
O presidente da Xunta, Alfonso Rueda, acompañado da conselleira de Medio Ambiente e Cambio Climático, Ángeles Vázquez, participou hoxe en Mos no acto de entrega das Bandeiras Verdes de Galicia, que cualificou como “un exemplo do compromiso dos concellos e da súa veciñanza coa terra”.
“Este é un acto de amor pola nosa terra, no que enviamos unha mensaxe de que non só os responsables municipais senón o conxunto dos veciños están comprometidos con ter un concello fermoso e sostible. Concienciados con esa mentalidade verde de Galicia fermosa, Galicia bonita, de esa Galicia Calidade”, afirmou o titular do Goberno galego.
A Bandeira Verde de Galicia, creada pola Xunta en 2020, consolidouse como un distintivo pioneiro a nivel estatal, sendo Galicia a primeira comunidade autónoma con un selo propio que distingue o esforzo local pola paisaxe, a eficiencia enerxética, a educación ambiental e a xestión responsable dos recursos.
Na súa sexta edición, o programa acada unha cifra récord con 33 concellos recoñecidos, o que supón un incremento do 40% respecto ao ano pasado. A provincia da Coruña lidera a clasificación con 15 municipios galardoados, mentres que Lugo, Ourense e Pontevedra contan con seis localidades cada unha.
Rueda destacou que esta distribución “amosa que a Bandeira Verde é unha ferramenta de cohesión territorial”, ao permitir que tanto municipios do interior como do litoral poidan acceder ao mesmo recoñecemento.
Entre os concellos distinguidos este ano figura Mos, recoñecido pola presentación de once iniciativas sostibles, como o Plan de Acción polo Clima e a Enerxía Sostible, proxectos de mobilidade activa, medidas de eficiencia enerxética, xestión responsable da auga e programas de educación ambiental.
Durante o acto, o presidente avanzou a creación en 2026 da Rede de Concellos Bandeira Verde de Galicia, unha estrutura de cooperación que permitirá compartir boas prácticas, desenvolver proxectos conxuntos e ofrecer apoio técnico e económico aos municipios adheridos. A Rede contará cun foro anual de expertos e cunha páxina web de referencia, co obxectivo de reforzar o posicionamento de Galicia en Europa como territorio comprometido coa paisaxe e a sostibilidade.
Rueda enmarcou esta iniciativa dentro da nova Estratexia Galega da Paisaxe Horizonte 2030, que está a elaborar o Instituto de Estudos do Territorio. A estratexia integrará a protección da paisaxe en ámbitos como a ordenación do territorio, a mobilidade, o turismo e a educación, co propósito de facer da paisaxe un eixo transversal do desenvolvemento sostible e da identidade galega.
“O obxectivo é que a conservación da paisaxe, que é tanto como dicir a conservación de Galicia e dos seus concellos, estea presente en todas as políticas públicas”, concluíu o presidente da Xunta.
