O Outono das Artes da Deputación da Coruña achega ao Auditorio Municipal de Ribeira, coa colaboración do Concello, dúas propostas culturais nas que a música terá gran protagonismo: Retrincos, de Airiños, e a actuación de Antía Muíños, presentando o seu disco Anfibia por veces.
“O outono é unha época na que seguimos desfrutando da cultura con accións pensadas para desenvolverse en espazos pechados e, desta vez, temos unha función que mestura teatro e música, así como un concerto. Son dúas actividades que chegan a través do ente provincial, pero que, ao mesmo tempo, se enmarca na programación municipal Outono Cultural, cuxo programa completo desvelaremos en vindeiras datas, pero no que, podo adiantar, a música ten un papel clave”, explica a concelleira de Cultura, Ana Barreiro.
Porase en escena Retrincos, no domingo, 8 de novembro, ás 19.00 horas, onde a Banda da Escola de Música de Rianxo e Teatro Airiños unen a música en directo e a dramatización para revisitar a obra de Castelao dende unha perspectiva escénica e musical. En consecuencia, aquí combínase a interpretación teatral de varios relatos de Retrincos coa execución da obra composta por David Fiuza Souto, creando un diálogo entre palabra e música que achega ao público o universo literario dun dos grandes referentes da cultura galega. O espectáculo conclúe coa interpretación de Lela; unha das pezas máis emblemáticas do patrimonio musical galego.
E a outra actividade é a actuación de Antía Muíño, no sábado, 14 de novembro, ás 20.00 horas. Co seu novo disco Anfibia por veces, a artista consolídase como una das voces máis singulares da nova
música galega. A súa proposta transita con naturalidade entre a canción de autora, o jazz-pop e a tradición oral, construíndo un universo sonoro delicado e contemporáneo no que conviven a intimidade das composicións propias e a forza expresiva do canto tradicional. No escenario, Antía acompáñase dunha formación integrada por Miguel Arribas, Ton Risco e Yudit Almeida; catro intérpretes que crean un diálogo musical rico en matices, onde a voz,a percusión, os ventos e o contrabaixo se poñen ao servizo dun repertorio que explora novas formas de entender a música galega desde a creación actual.
Ambas sesións están destinadas ao público en xeral e a entrada é gratuíta, con apertura de portas media hora antes do inicio.
