Isabel Risco estará este venres 17 de outubro, ás 21.00 horas, no Centro Social de Abanqueiro (Boiro), presentando ante o público local Nabiza Girl II: As aventuras de Nabiza Girl: o extraño caso da cultura minguante, unha representación teatral para público adulto.
Venda de entradas dende unha hora antes da función.
A superheroína máis irreverente de Galicia está de volta. Nabiza Girl, a nosa loitadora do rural, regresa ao ataque con máis forza, máis humor e máis ganas de dalo todo. Nesta nova aventura, terá que enfrontarse a inimigos insospeitados para loitar contra a desaparición da cultura.
Nesta nova odisea a superheroína pasará por un feixe de situacións disparatadas nas que Nabiza deberá empregar todas as súas habilidades para sobrevivir e vencer ao inimigo para salvarnos.
Trátase, en palabras de Culturactiva, “dunha comedia valente, destemida, arriscada e chea de sorpresas nun espectáculo cheo de feminismo, reivindicación do galego e do noso medio; pero cargado, sobre todo, de gargalladas e humor”.
