Todas as persoas de entre 55 e 74 que sexan fumadoras ou deixasen de fumar nos últimos dez anos serán convocadas para realizar probas diagnósticas.
O Consello da Xunta aprobou este luns a ampliación a todo o territorio galego do programa piloto de detección temperá do cancro de pulmón, tras analizar os bos resultados obtidos na área sanitaria da Coruña.
Segundo explicou o presidente da Xunta, Alfonso Rueda, a decisión baséase na eficacia do proxecto inicial, no que 273 persoas foron chamadas a participar e o 72 % acudiron á cita, detectándose cinco casos de cancro, a maioría en fase inicial, así como outros problemas de saúde relevantes.
O programa está dirixido a persoas de entre 55 e 74 anos que sexan fumadoras ou deixasen de fumar na última década. Todas elas serán convocadas para realizar un TAC torácico, e no caso de detectarse algunha anomalía, activaríanse de inmediato as vías rápidas para efectuar novas probas diagnósticas.
A extensión do programa permitirá chamar arredor de 49.000 persoas en toda Galicia, que serán avisadas mediante SMS ou correo electrónico. En función dos resultados, a Consellería de Sanidade valorará incorporar o cribado de cancro de pulmón á carteira estable de servizos do Sergas.
