A Asociación Boirense de Empresas (ABE) abre este 16 de outubro o período de votación dos Premios ABE á Excelencia Empresarial 2025, que un ano máis recoñecerán o esforzo, a innovación e a traxectoria das empresas e comercios locais.
Segundo lembra a asociación, un dos elementos que fan destes galardóns “un recoñecemento especialmente valioso” é que os premios de Mellor Comercio e Mellor Empresa son elixidos polos propios compañeiros e compañeiras empresarios/as, socios da ABE. “Son eles quen, a través do seu voto, distinguen ás empresas que destacan polo seu traballo e contribución ao tecido económico de Boiro”, salienta a ABE, lembrando que as votacións realizaranse mediante un formulario online que cada asociado/a recibirá no seu correo. A única limitación é que non se poderá votar a aquelas empresas que xa resultaron premiadas en edicións anteriores. O prazo permanecerá aberto ata o 31 de outubro.
Ademais destes dous galardóns, a directiva da ABE concederá o Premio de Honra, co que se distingue a unha persoa empresaria pola súa traxectoria profesional e a súa contribución á economía local.
A gala de entrega dos premios celebrarase o 14 de novembro na Pousada da Galiza Imaxinaria, nunha noite especial na que o tecido empresarial de Boiro volverá reunirse para poñer en valor o talento, o compromiso e a excelencia das súas empresas e na que como novidade, soamente se poderá acceder con invitación física que as empresas asociadas poden solicitar e recoller nas oficinas da ABE.
Historia dos Premios ABE
Dende o ano 2017, a ABE vén recoñecendo o labor das empresas e comercios locais a través destes galardóns:
2017 → Farmacia Cimadevila | A Pousada da Galiza Imaxinaria
2018 → Baldani Concept Store | La Doce
2019 → Super Claudio A Tenda de Pepa | Moai
2021 → The Desire Shop | Jealsa | Premio de Honra: José García Sánchez
2022 → Carnicería Moncho Boga | A Terraza do Furancho | Premio de Honra: José España Silva
2023 → Cetarea Angel Mar | Coaxial | Premio de Honra: Rosa María Teixeira Barcala
2024 → Gastrolab Arousa | Grupo JJ Chicolino | Premio de Honra: José Otero Arias
Nos vindeiros días a ABE anunciará como se poderá acceder aos convites para a gala, quen será o/a presentador/a e outras novidades sobre esta edición dos premios.
