Coincidindo co cambio de hora e o empeoramento das condicións meteorolóxicas, a Dirección Xeral de Tráfico (DXT) e a Garda Civil de Tráfico poñen en marcha este luns un Plan de Vixilancia Especial en Galicia centrado no estado dos pneumáticos e o sistema de iluminación dos vehículos.
O obxectivo principal é reforzar a conciencia sobre a importancia de manter os pneumáticos en bo estado para garantir a adherencia, e asegurar que as luces funcionen correctamente para mellorar a visibilidade e previr accidentes.
A Delegación do Goberno en Galicia subliñou que estes elementos son especialmente críticos para motociclistas e peóns, dous colectivos vulnerables nas vías. Cifras preocupantes No que vai de ano, Galicia rexistrou a morte de 10 peóns e 19 motoristas en accidentes de tráfico en vías interurbanas. A nivel nacional, estímase que máis dun millón de vehículos —ao redor do 5% do parque automobilístico— circulan con defectos graves nos seus pneumáticos, como desgaste irregular, presión incorrecta ou debuxo por baixo do mínimo legal de 1,6 mm.
Obrigación legal A DXT lembra que é obrigatorio utilizar a iluminación regulamentaria en condicións de baixa visibilidade, como néboa, choiva intensa, neve ou nubes de po. O incumprimento pode carrexar sancións e, máis grave aínda, poñer en risco a seguridade viaria. Este plan busca non só sancionar, senón tamén educar e previr, nun momento do ano en que as condicións de condución vólvense máis esixente.
