A presidenta da Asociación Rianxeira de Empresarios (ARE), Conchi Martínez, e o alcalde de Rianxo, Julián Bustelo, presentaron este venres 10 de outubro, no salón de actos do Concello de Rianxo, a nova campaña de dinamización comercial da patronal: Rianxo Latexa, unha das cinco iniciativas galegas seleccionadas pola Xunta de Galicia dentro do programa autonómico O teu comercio local é extraordinario.
A presidenta da ARE destacou durante a súa intervención que Rianxo Latexa é unha campaña organizada pola ARE, en colaboración co Concello de Rianxo e co co-financiamento indispensábel da Xunta de Galicia, e subliñou que esta selección “supón un orgullo e un recoñecemento ao traballo colectivo do noso comercio local e á súa capacidade innovadora”.
A campaña desenvolverase do 13 ao 18 de outubro e inclúe unha ampla programación de actividades abertas á veciñanza e visitantes: feira do comercio, xogos, inchables, animación de rúa, actuacións musicais, maxia, clown, obradoiros e degustacións.
Como incentivo ás compras, celebrarase un sorteo presencial o sábado 18 de outubro ás 21:00 h na praza de Castelao, no que se repartirán tres vales de compra de 500 euros cada un para gastar nos establecementos locais adheridos.
Durante a presentación, a presidenta da ARE quixo agradecer o apoio da Xunta de Galicia e do Concello de Rianxo, así como recoñecer “a implicación e compromiso dos negocios que forman parte da asociación”, convidando tamén aos que aínda non o son a achegarse á sede da ARE “para coñecer de preto o traballo que se fai en favor do comercio local”.
Tamén tivo palabras para a veciñanza, “que segue a confiar no comercio que lle dá vida á vila”, e rematou cunha mensaxe clara: “Rianxo Latexa aspira a converterse nunha referencia sobre como o traballo conxunto entre asociacións, administración e cidadanía pode impulsar o comercio local de maneira efectiva e participativa. Animamos á prensa a acompañarnos, a difundir a campaña e a dar visibilidade ao esforzo colectivo que fai posible este proxecto”.
