Se ben a choiva non o permitiu a semana pasada, o Entroido de Verán de Noia (Carnaval de Noia) ten todas as trazas de celebrarse este venres 5 de setembro. Será a segunda edición desta nova celebración estival, organizada por Noia en Marcha en colaboración co Concello, e a previsión é que as actividades comecen a partir das 20.00 horas. O obxectivo é achegar a cidadáns e visitantes “unha noite de música, disfraces e moita festa”.
A programación inclúe unha importante presenza de DJs locais, como é o caso de DJ Pichi, de DJ Manutxo ou de DJ Cassanova.
Tamén na zona da rúa do Curro contarase coa presenza do grupo Bafana Bafana e cunha animación de baile ao cargo do grupo Tarafa.
A Alameda de Noia, pola súa conta, contará na súa zona cunha discoteca móbil e con animación musical.
A velada, que tamén achegará actuacións no Malecón de Gasset (DJ Manutxo) e na praza da Constitución (DJ Pichi), comezará ás 20:00h, estenderase ate a 01:30h da mañá. Nese momento, dará arranque na praza do Tapal o Fin de Festa, que contará coa presenza do DJ Manutxo aos mandos da Disco Chocolate.
“Nesta edición buscamos consolidar o que apunta a ser unha cita de referencia de agora en diante no calendario de eventos noiés“, sinalou Manolo Seijas, concelleiro de festexos do Concello de Noia, quen asegurou que “nesta segunda edición, redobramos a animación musical e apostamos por dar opcións a todos e todas. Agradecemos enormemente a colaboración da hostalería, crucial na organización deste evento”.
