Beatriz Sestayo, xerente de Solo Empresarial do Atlántico (SEA) e o responsábel comercial da entidade estatal, Jose Rey, reuníronse na mañá deste 11 de setembro no Concello de Noia co alcalde, Francisco Pérez Caamaño, e o asesor de Urbanismo, Carlos Abal, para abordar a necesidade de dotar ao municipio de novos terreos industriais. Durante o encontro, o rexedor trasladou a Sestayo a urxencia de contar con máis superficie empresarial na zona, porque na actualidade atópase esgotado e “a demanda é altísima”.
Tanto SEA como o Goberno municipal coincidiron na necesidade de avanzar sen demora para buscar axiña as mellores alternativas. Así, desde o Concello elaborarán un dossier con todas as opcións posíbeis, incluíndo aspectos como infraestruturas e accesos; e SEA encargará de contado un estudo de viabilidade.
Á saída da reunión, o alcalde asegurou que o encontro “foi moi frutífero para dar os primeiros pasos cara á ampliación do noso solo industrial. Noia leva anos freada no seu medre económico por esta eiva, e hoxe podemos dicir que xa comezamos a camiñar para resolvelo. En apenas catro semanas de goberno logramos sentar as bases deste proxecto imprescindíbel para ou futuro do noso concello”.
Pola súa banda, Beatriz Sestayo manifestou o seu total interese nesta zona “porque cremos absolutamente no seu potencial económico”. Ademais, engadiu que “a intención de SEA é promocionar o asentamento de novas empresas en Galicia, que xeren emprego e, en consecuencia, crecemento económico. “E esta zona necesita que a apoiemos porque existe unha gran demanda por parte do empresariado”. Sestayo quixo incidir en que a colaboración cos concellos é fundamental para que este desenvolvemento fágase efectivo, valorando moi positivamente este primeiro encontro.
