Este venres 5 de setembro, a partir das 18.00 horas, o proxecto ULA Libraría Social da Serra Outes que comanda Maitane Vicente propón coñecer a fondo un dos grandes proxectos ambientais galegos dos últimos anos: o proxecto ReNatur_Outes, responsábel entre outras cousas da Declaración de Dereitos do Río Tins. A actividade inclúe un paseo a carón do río Tins (cuxa conservación é un dos grandes obxectivos do proxecto, iniciado hai dous anos). A xornada de divulgación arrincará ás 18.00 horas e inclúe tamén un coloquio. Ás 19:15 está previsto o dito roteiro para “ver sobre o terreo que cousas se fixeron e por que”.
Proxecto ReNatur_Outes
Liderado polo Concello de Outes, Renatur_Outes conta coa participación de investigadores das tres universidades públicas galegas, a Fundación Montescola e o CEER (Centro de Estudos Eurorrexionais Galicia- Norte de Portugal) e o apoio da Fundación Biodiversidad do Ministerio para la Transición Ecológica y el Reto Demográfico (MITECO) no marco do Plan de Recuperación, Transformación e Resiliencia (PRTR), financiado pola Unión Europea – NextGenerationEU.
No eixo do proxecto están a recuperación do bosque de ribeira, o control de especies exóticas invasoras, como as distintas especies de acacia presentes (Acacia dealbata e Acacia melanoxylon), a Tradescantia fluminensis ou as plantas do xénero Crocosmia, a limpeza de residuos da contorna fluvial, e a sensibilización ambiental mediante accións de voluntariado, formativas e divulgativas, fomentando a participación pública da cidadanía de Outes mediante sesións de gobernanza cidadá ao longo de toda a vida do proxecto. “Desde xeito non só se pretende alcanzar unha recuperación e mellora da biodiversidade, mais xerar un compromiso social máis alá da propia vida do proxecto”, explica o equipo responsábel desta modélica iniciativa ambiental.
