No porto de Ribeira continúan os labores de extinción do incendio declarado onte no barco arrastreiro Awadi, unha embarcación de 50 metros de eslora, con bandeira mauritana e propiedade dun armador de Compostela.
O alcalde de Ribeira explicou á Televisión de Galicia que os traballos están a ser “moi complicados” e advertiu de que poderían prolongarse varios días debido á intensidade do lume e ás dificultades para controlar as lapas.
Segundo as primeiras investigacións, o incendio puido orixinarse durante uns traballos de mantemento e soldadura, probablemente por unha faísca. As chamas, iniciadas na zona das adegas, propagáronse con rapidez por toda a embarcación.
Na zona traballa un amplo dispositivo composto polos bombeiros de Ribeira e de Boiro, así como embarcacións de Salvamento Marítimo. Afortunadamente, non se rexistraron feridos.
A principal preocupación agora céntrase en dous riscos: por unha banda, o impacto ambiental que podería xerar o vertido de materiais á auga, e por outra, a posibilidade de que o Awadi afunda pola gran cantidade de auga acumulada no seu interior durante as tarefas de extinción.
