O Concello de Noia acolleu esta a presentación da campaña de verán de doazón de sangue organizada pola Axencia de Doazón de Órganos e Sangue (ADOS), que estará este venres 12 e sábado 13 de setembro na vila. A unidade móbil situarase diante da Casa Consistorial o venres en horario de 10:00 a 14:00 e de 16:00 a 21:00 horas, e o sábado de 10:00 a 15:00 horas.
Na rolda de prensa participaron José María Vázquez Estepa, responsábel de xestión de colectas de ADOS; María del Carmen Vázquez, secretaria da Asociación Noia Histórica; e o alcalde de Noia, Francisco Pérez.
José María Vázquez Estepa salientou que “a doazón de sangue é crucial porque o sangue ten data de caducidade e todos os días os hospitais galegos necesitan máis de 400 doazóns para atender as urxencias e operacións”. O responsábel de ADOS agradeceu a gran acollida que a campaña de verán tivo na cidadanía e animou á veciñanza de Noia a seguir colaborando.
Pola súa banda, María del Carmen Vázquez destacou que “desde Noia Histórica sempre estaremos abertos a colaborar con campañas desta importancia social, porque a saúde e a solidariedade son valores fundamentais que tamén queremos promover entre o tecido asociativo e comercial da vila”.
Finalmente, o Alcalde de Noia, Francisco Pérez, puxo en valor que “Noia é un concello líder en doazón de sangue, con case o dobre da media galega, e
queremos seguir avanzando por ese camiño”. Ademais, fixo referencia ao lema estival da campaña: “Este ano falábase de praias e toallas, pero xa comezou a chover e aquí o que fai falta é traer o paraugas. Iso si, o importante é que Noia volva amosar a súa solidariedade e que todo o mundo se anime a doar”.
