Este domingo 21 de setembro o Barbanza vivirá unha xornada histórica de deporte na rúa coa celebración do III Trofeo Portus Apostoli – Campionato de Galicia Júnior de Fondo en Estrada, organizado polo Picusa Academy en colaboración coa Peña Ciclista Noela.
A proba, que decide a camisola autonómica da categoría xuvenil, contará cun percorrido de 114,1 km con saída ás 10:00 h desde a Confraría de Portosín. O pelotón completará catro voltas ao circuíto urbano con epicentro na Alameda de Noia antes de afrontar o esixente ascenso a Vilacoba. O desenlace chegará sobre as 12:40 h, coa liña de meta situada na Alameda de Noia.
Un total de equipos galegos e tamén portugueses daranse cita nesta competición de máximo nivel autonómico, un evento que, en palabras do Concello noiés, “converterá Noia no corazón do ciclismo”. E engaden: “Convidamos a toda a veciñanza a saír ás rúas para animar aos corredores e gozar dunha festa deportiva que tamén é un escaparate para a nosa vila”.
