O Concello de Ribeira pediu á veciñanza que evite achegarse á zona do porto comercial e que limite o contacto co fume xerado polo incendio, recomendando manter as fiestras pechadas.
Un equipo de mergulladores localizou este martes a vía de auga responsable da escora que sofre o Awadi, o arrastreiro de bandeira mauritana que arde desde a tarde do luns no porto de Ribeira.
Segundo confirmaron fontes da emerxencia, a entrada de auga producíase polo túnel de descarga do parque de pesca, o conduto polo que as capturas se introducen na adega desde a cuberta. Actualmente os traballos céntranse en taponar esa vía de auga, o que permitiría recuperar a flotación do buque.
Mentres tanto, continúan as labores para arrefriar o interior do pesqueiro, ao que resulta imposible acceder polas altas temperaturas acumuladas tras máis de 24 horas de lume. As bombas de achique seguen funcionando e un arrastreiro empurra o Awadi cara ao peirao para tentar darlle estabilidade, ao tempo que se procura alixeirar a súa carga.
Aínda que todos os esforzos están enfocados en evitar o afundimento, no porto xa están despregadas barreiras anticontaminación como medida preventiva. Os equipos de intervención asumen que os traballos de extinción e refrixeración poderían prolongarse durante varios días, xa que o buque almacena miles de litros de combustible e outros materiais inflamables.
O Concello de Ribeira pediu á veciñanza que evite achegarse á zona do porto comercial e que limite o contacto co fume xerado polo incendio, recomendando manter as fiestras pechadas.
O Awadi é un arrastreiro de 50 metros de eslora, propiedade dun armador compostelán, que se atopaba no porto ribeirense someténdose a tarefas de reparación antes de regresar á actividade pesqueira.
P
