O Centro Social de Escarabote vai dar acollida esta semana a un divertido espectáculo para a rapazada: a historia de O Grúfalo contada por Carmen Domech dentro do programa Ler Conta Moito. Será este xoves 4 de setembro a partir das 20.00 horas, con entrada libre.
O espectáculo O Grúfalo está baseado no texto do libro de Julia Donaldson e nas ilustracións de Axel Scheffer para o deseño dos monicreques.
Conta a historia dun ratiño que pasea pola fraga e se atopa cun raposo, cun moucho e cunha serpe. Os tres queren papalo. O enxeñoso ratiño crea un monstro imaxinario para sobrevivir. E cal é a súa sorpresa cando ve fronte a el a súa fantasía feita realidade. E con ganas de merendar… ratiños, por exemplo. Pero, o noso rato coa súa intelixencia, valentía, astucia e confianza en si mesmo sobrevivirá a todos eses depredadores máis feroces e fortes ca el.
