Ambar, asociación da nosa comarca centrada na inclusión de persoas con diversidades funcionais, anunciou este 30 de setembro o lanzamento oficial do seu primeiro ecommerce solidario, dispoñíbel a través da páxina web oficial da entidade. Ambar explica que esta nova canle de venda online “nace co obxectivo de amplificar o alcance e a visibilidade dos produtos artesáns únicos elaborados nos diferentes obradoiros ocupacionais da entidade, como cestaría, encadernación ou xabóns”.
O lema que acompaña o lanzamento subliña a misión da asociación: Impulsando Vidas Independentes en Comunidade. Detrás de cada peza hai o traballo, o talento e a autonomía das persoas con diversidade funcional que participan nos obradoiros.
A asociación explica que esta tenda en liña “non é só unha tenda, é unha xanela que mostra o potencial e a profesionalidade dos nosos artesáns, onde cada compra é un apoio directo e fundamental para incrementar a autonomía e a participación social das persoas usuarias do centro”.
A venda destes produtos solidarios contribúe directamente ó mantemento e á ampliación dos programas de emprego e formación da asociación, poñendo en valor o traballo manual e a artesanía galega.
Para celebrar a apertura, Ambar preparou unha promoción especial: as 20 primeiras compras realizadas na tenda en liña recibirán un agasallo sorpresa adicional no seu paquete. Con esta iniciativa búscase “incentivar as primeiras visitas e premiar a colaboración máis inmediata”.
A Asociación Ambar convida a toda a cidadanía, empresas e institucións a visitar o novo espazo de venda e “a mercar con propósito, apoiando a inclusión social e laboral no Barbanza”.
