A praia de Coroso acolle esta fin de semana unha nova edición da Regata GADIS, organizada polo Club Náutico Deportivo de Ribeira, que converte a localidade nun referente da vela infantil e xuvenil.
A primeira xornada estivo marcada por unhas condicións de mar e vento moi favorábeis, con compoñente sur e intensidade media de 8 a 10 nós, o que permitiu completar o programa previsto: tres mangas para Optimist Regata e ILCA 4, e dúas para Optimist Escola.
Optimist Regata e Escola
O Real Club Náutico de Portosín dominou provisionalmente en Optimist Regata, con Alonso Ons no liderado e Pablo Rubio no terceiro posto. Entre ambos situouse Miguel Gómez, do Náutico de Ribeira, que se fixo coa prata.
Na categoría de Escola destacou o papel do club anfitrión, co triunfo de Nico Sampedro, acompañado no podio por Valeria Serrano e Mayra Otero, tamén do Náutico de Ribeira.
Vela xuvenil
Na clase ILCA 4, o protagonismo foi para os regatistas locais: Bruno Iglesias gañou as tres mangas disputadas, seguido de preto por Daniel Iglesias, mentres que Enzo Ferrón situouse en terceira posición, completando un podio íntegramente ribeirense.
A competición continuará o domingo, cunha nova saída prevista ás 10:30 horas. A entrega de premios terá lugar ás 18:00 horas.
