O Concello da Pobra do Caramiñal volverá enviar á Consellería de Medio Ambiente e Cambio Climático a documentación requirida pola vertedura da Ribeiriña, despois de facelo xa en dúas ocasións durante o mes de abril.
Segundo informa o goberno local, o expediente fora elaborado polo persoal técnico de Urbanismo e Medio Ambiente e remitido á Xunta o 8 de abril, pero o envío foi rexeitado polo alto volume dos arquivos. A operación repetiuse o 29 do mesmo mes, sen que desde entón o Concello recibise resposta oficial máis alá das declaracións difundidas polos medios de comunicación.
O equipo de goberno indica que os servizos técnicos municipais xa están a traballar para realizar por terceira vez o trámite e reclama á Administración autonómica maior axilidade para atopar unha solución a este problema medioambiental.
Desde o Concello lembran que as competencias para actuar na Ribeiriña corresponden a Costas e á Xunta de Galicia, e insisten na necesidade de intervir con urxencia para resolver esta situación.
