Villaverde reúnese coa Federación de Produtores Mexilloeiros da Ría de Arousa para estudar novas liñas de colaboración
A conselleira do Mar, Marta Villaverde, mantivo este mércores en Santiago de Compostela un encontro cos representantes da recentemente creada Federación de Produtores Mexilloeiros da Ría de Arousa (FEPMAR). O obxectivo da reunión foi analizar as necesidades do sector e explorar posíbeis liñas de colaboración para reforzar a actividade mexilloeira, a principal da acuicultura galega.
A FEPMAR constituíuse o pasado mes de maio e integra arredor do 40% das 3.300 bateas existentes en Galicia, a maior parte delas situadas nas Rías Baixas.
Villaverde puxo en valor o traballo conxunto entre sector e Administración para facer fronte a retos como a valorización do produto ou o impacto do cambio climático nas zonas produtivas. Neste sentido, destacou o labor dos centros de investigación autonómicos como o INTECMAR, encargado de garantir a seguridade e calidade do mexillón, e o CETMAR, que impulsa proxectos como Apromex ou Capacitamex para mellorar a sustentabilidade e competitividade da actividade.
A titular de Mar subliñou tamén o liderado galego na produción de mexillón a nivel europeo, cunha cota do 44,6% que sitúa a España como terceira produtora mundial, só por detrás de China e Chile. No ano 2024, Galicia produciu case 179.000 toneladas, cunha facturación superior aos 128 millóns de euros, un 7,6% máis que no 2023. Do total, o 73% destinouse ao mercado en fresco e o 27% á industria transformadora.
