A Biblioteca Municipal de Ribeira comezou o curso cunha homenaxe ao escritor e ilustrador recentemente falecido Carlos Taboada (1979-2025), que ten colaborado coa Biblioteca de Santa Uxía en distintas actividades de contacontos xunto cos demais integrantes do colectivo Polo Correo do Vento. “Facémolo”, explicaron o bibliotecario Juan Callón e a concelleira Cruz Rivadulla, “seguindo o ronsel da Biblioteca Pública Municipal de Santiago Ánxel Casal, expoñendo os libros da nosa sala infantil da autoría dese grupo dedicado a publicacións e actividades de promoción da lectura para o público máis novo, e tamén as tres últimas ilustracións que nos deixou como agasallo”.
Carlos Taboada (Pontevedra, 1979-2025) foi ilustrador, publicista e escritor. En 2008 fundou xunto a Enrique Mauricio o colectivo de actividades creativas Polo Correo do Vento, que levou a cabo numerosos traballos de ilustración, publicidade, creación audiovisual e diversas publicacións infantís. Dedicouse á realización de actividades de animación á lectura, obradoiros de ilustración e á creación de historias. A biblioteca de Pedrarcana (Xerais, 2018) foi finalista do Premio Merlín de Literatura Infantil 2017. Con O caderno de Roque (Xerais, 2024) volve quedar finalista deste premio.
Carlos faleceu de morte repentina o 13 de agosto de 2025 con 45 anos.
