Seis persoas tiveron que ser rescatadas polos bombeiros este luns á tarde debido a un incendio declarado nun edificio da rúa Rafael Calleja, na Pobra do Caramiñal. O lume, que se iniciou arredor das 16:40 horas, quedou finalmente extinguido, aínda que causou danos na sala e no corredor da vivenda onde se orixinou, ademais de provocar acumulación de fume en varias vivendas do inmoble.
Nun primeiro momento, dúas persoas permanecían no interior do piso afectado, pero conseguiron saír ao exterior polos seus propios medios. Outros veciños quedaron atrapados polas intensas lapas e o fume nas escaleiras, polo que foi necesaria a intervención dos bombeiros para evacualos.
Ata o lugar desprazáronse os Bombeiros de Boiro e Ribeira, así como a Garda Civil, a Policía Local e Protección Civil da Pobra. O helicóptero medicalizado con base en Santiago chegou a tomar terra preto da zona, mobilizado por Urxencias Sanitarias de Galicia-061.
As seis persoas rescatadas foron atendidas polos servizos sanitarios no propio lugar, aínda que ningunha precisou ser trasladada a un centro hospitalario.
O operativo concluíu tras a extinción das lapas e a ventilación do edificio para garantir a seguridade dos veciños.
