O Barbanza Golf de Boiro acollerá os próximos 22, 23 e 24 de agosto o XI Torneo de Golf CONGALSA, unha cita xa consolidada no calendario galego que cada ano atrae a un maior número de participantes e seareiros/as, segundo confirmou a organización.
Nesta edición a previsión é chegar a preto dun centenar de xogadores chegados de distintos puntos de Galicia, que demostrarán a súa destreza no campo, competindo nas categorías Scratch, Hándicap, Senior, Feminina e Júnior. A xornada final, o domingo 24, incluirá a partir das 13.00 horas a entrega de premios, seguida dunha festa de clausura con sorteo de agasallos e degustación de produtos elaborados por CONGALSA.
Este evento, impulsado como dixemos pola firma da Pobra CONGALSA, non só fomenta a práctica do golf, senón que tamén actúa como dinamizador turístico e económico para a comarca do Barbanza, atraendo visitantes e xerando actividade na zona. As inscricións permanecen abertas ata o xoves 20 ás 22.00 horas e poden formalizarse a través do correo electrónico barbanzagolf@gmail.com , na web golfdirecto.com, no teléfono 651 172 945 ou directamente nas instalacións do campo de golf de Boiro.
