O PSdG e A Marea de Noia compartiron os seus obxectivos e as súas liñas de goberno logo de que tivera prosperado, este 11 de agosto, a moción de censura contra o executivo do PP e de N.O.I.A. A folla de ruta do novo equipo do Concello ten como finalidade “garantir un cambio real e efectivo na xestión do Concello de Noia, baseado na transparencia, na xustiza social e no fortalecemento dos servizos públicos”, adiantaron, ao tempo que recoñeceron “a situación económica e institucional crítica que atravesa o Concello de Noia”.
A nova etapa política, sinalan, demanda especial atención nos seguintes tres aspectos: recuperación dos servizos públicos, racionalización do gasto e unha contratación transparente e eficiente. Como primeira medida, o novo executivo solicitará mediante providencia de alcaldía un estudo actualizado da situación económica e financeira do Concello para establecer as prioridades da xestión.
O novo goberno comprométese a actuar baixo os seguintes principios:
-Transparencia e bo goberno.
-Participación cidadá e cooperación co tecido asociativo.
-Defensa dos servizos públicos e benestar social.
-Racionalización do gasto e eficiencia administrativa.
-Desenvolvemento económico sustentábel.
-Cohesión territorial
-Igualdade real e efectiva, cun claro compromiso co feminismo avogando polas políticas que abordan as desigualdades de xénero e promoven a xustiza social.
O novo executivo terá a seguinte composición:
PSdG de Noia: Alcaldía; Urbanismo; Relacións Institucionais; Promoción Económica (turismo, emprego e industria); Persoal; Seguridade Cidadá; Casco Histórico; Servizos Sociais, Benestar e Saúde; Deportes; Servizos Municipais (emerxencias, parques, xardíns, limpeza, medio ambiente, auga e saneamento); Eventos; e Mocidade, Educación, Conciliación e Novas Tecnoloxías.
Marea Cidadá de Noia: 1ª tenencia de Alcaldía, Facenda, Mar, Vivenda, Réxime Interno, Festexos, Servizo de Obras, Igualdade, Participación Cidadá, Cultura e Normalización Lingüística.
Obxectivos estratéxicos
Racionalización do gasto
–Planificación das obras municipais, dando prioridade a aquelas que teñan que ver co saneamento e a subministración da auga.
-Xestión eficiente das obras municipais.
-Plan de rozas e posta en marcha dunha brigada parroquial.
-Licitación no primeiro ano do Servizo de Axuda no Fogar e posterior municipalización.
Transparencia, participación e bo goberno
-Mellora na transparencia das contas.
-Organización de xuntanzas nas parroquias.
-Creación de ferramentas de participación cidadá.
-Coordinación educativa coas ANPAS.
-Mellora na xestión das subvencións deportivas.
-Liberación do aparcadoiro da rúa Xuíz Falcone e reorganización das zonas de aparcamento.
-Axilizar axudas para material escolar, transporte e comedor.
-Reforzo do persoal municipal e mellora da xestión da Policía Local.
Dinamización económica
–Consolidar unha oferta turística estábel e desestacionalizada con roteiros, visitas guiadas e promoción das parroquias.
-Creación da mesa sectorial do mar co fin de abordar os problemas da pesca e o marisqueo co sector.
-Posta en funcionamento dunha Axencia de Desenvolvemento Local real para fomentar o emprendemento e dar soporte ao tecido empresarial.
-Axilización do desenvolvemento industrial con habilitación de solo para empresas.
-Dinamización da hostalaría e recuperación da Praza de Abastos.
-Sacar a concesión a xestión do Albergue da Chaínza.
Máis servizos, máis cultura
-Apertura da Biblioteca Municipal nun horario máis amplo.
-Ampliación dos espazos deportivos.
-Garantir a conciliación familiar durante todo ano.
-Reclamación da construción dunha Escola Infantil Galiña Azul en Noia.
-Sentar as bases para a construción dun Centro de Día municipal.
-Establecer dunha axenda cultural anual, orientada a todos os públicos.
-Desenvolvemento de actividades enfocadas á promoción da igualdade, á loita contra a violencia machista e á defensa dos dereitos LGTBIQ+.
-Apertura do Museo do Mar ao público.
-Reclamar a creación dun Museo das Laudas.
-Recuperación da Feira do Libro.
-Posta en marcha do Servizo de Normalización Lingüística.
Reorganización do espazo e coidado do medio
-Creación dun aparcadoiro de autocaravanas.
-Revisión do Plan Municipal de Prevención e Defensa Contra Incendios Forestais e monitoraxe do cumprimento das obrigas nas faixas de xestión de biomasa.
-Reclamar a construción de vivenda pública en Noia e estudo da participación en programas de rehabilitación no casco histórico.
