A Ría de Muros e Noia volveu ser escenario dun gran espectáculo náutico coa celebración do Trofeo Pitusa Sabín – Regata Mar de #Finisterre, organizado polo Real Club Náutico de Portosín. A pesar de que a segunda xornada comezou con néboa, baixas temperaturas e ausencia de vento, a competición logrou completar todas as probas previstas para a clase Open e unha máis para os ORC, antes de que a bruma regresase e reducise de novo a visibilidade.
O campo de regatas ofreceu un amplo abanico de condicións, pasando da calma absoluta a refachos de ata 12 nós, o que permitiu disputar dous barlovento-sotavento en Cruceiro.
Resultados deportivos
En ORC 1-3, o Mirfak, patroneado por Diego López e pertencente á Armada Española en Ferrol, volveu impoñerse alzándose co título, do mesmo xeito que en 2024. Seguíronlle o Urbapaz, de Fran Edreira (CN Cabanas), e o Bon III, de Víctor Carrión (CN Punta Lagoa).
En ORC 4-5, o vencedor foi o Bacor, de Francisco Javier Villaamil, do club anfitrión de Portosín, seguido do Deep Blue, de Vicente Cid (RCN Vigo), e o Monterrei, de Paula Fernández, tamén de Portosín.
Na clase Open, o Cámping Ría de Arousa, de José Manuel Pombar (CN Arousa Norte), confirmou o seu liderado adxudicándose o título. Segundo foi o Ou Montaraz, de José Carlos Costas (RCN Portosín), e terceiro o Monte Ulía, de Eduardo Arán (tamén de Portosín).
Competición de alto nivel
O Trofeo Pitusa Sabín forma parte dos calendarios oficiais das Reais Federacións Española e Galega de Vela, sendo puntuable para a Copa de Galicia de Clubs, o Trofeo Presidente Xunta de Galicia – Circuito de Alto Nivel e a Clasificatoria Galega para o Campionato de España de Cruceiros. O Mirfak, tras as súas vitorias na Regata Infanta Elena e en Portosín, colócase á fronte do Trofeo Presidente e do propio Campionato de España.
Acto de clausura
A entrega de premios celebrouse na sede do club coa presenza dos patrocinadores, Dominga (Pitusa) Sabín e Jacinto Hernández, e representantes institucionais como Pepa Castro (vicepresidenta do club), Carlos Lorenzo (concelleiro de Deportes de Porto do Son), Juan Sanmartín Ferreiro (director de Portos de Galicia), María Mar Ferreiro Broz (Xunta de Galicia), o patrón maior Isaac Gaciño e varios directivos do RCNP.
O evento volveu poñer en valor o apoio do patrocinio privado e das institucións públicas, que fan posible que a ría siga acollendo competicións de máximo nivel deportivo e de gran atractivo turístico.
