Do 11 ao 15 de agosto de 2025, O Grove acollerá o Memorial Luís Rei, unha programación de actividades culturais e de lembranza dedicadas á figura de Xosé Luís Rei Núñez (1960–2015), mestre, activista social e político, e destacado estudoso da historia e cultura mariñeira.
Organizado polo Grupo Etnográfico Mascato, o evento contará coa colaboración da Asociación Dorna Meca, Culturgal, Galería Besada, Asoc. Os Amigos do Queimado e o BNG do Grove.
Inicio do memorial – Luns 11 de agosto
A homenaxe arrincará ás 19:00 horas no Cemiterio do Grove, onde familiares, amizades e camaradas depositarán flores e lerán poemas na súa memoria.
Ás 20:30 horas, a Galería Besada acollerá o acto Luís Rei e a Cultura Marítima, no que se presentará a revista Nova Ardentía. Intervirán Iria Fernández, Manolo Parada, Francisco Fernández Rei, Emilio Ínsua, Sole Rei, Rosa M. Fernández Otero e Antón Mascato, entre outros.
Peche do memorial – Venres 15 de agosto
As actividades finais celebraranse en Moreiras, Reboredo (O Grove).
- 10:00 h – Arribada de embarcacións tradicionais, organizada pola Asoc. Dorna Meca e Culturmar.
- 12:00 h – Presentación do libro A palabra sempre en alto. Traballos inéditos e dispersos, de Luís Rei, con intervencións de Javier Rey Núñez, Sabela Rei, Rebo, Isabel González Aviñó, Emilio Ínsua, Francisco Fernández Rei e Antón Mascato.
- 12:45 h – Coloquio aberto para compartir lembranzas e anécdotas sobre Luís Rei.
- 14:00 h – Concerto de música tradicional como peche das actividades.
O memorial quere pór en valor a traxectoria dun home implicado na defensa do patrimonio cultural, na investigación histórica e no compromiso social, deixando un legado que segue a inspirar o Grove e a súa contorna.
