O Concello de Boiro saca a licitación as obras para o acondicionamento do entorno do lavadoiro de Comoxo, unha actuación dun importe de 323.194,90 euros. As empresas interesadas en presentar as súas ofertas poden facelo a través da Plataforma de Contratos do Sector Público.
As actuacións que se prevén son a demolición do galpón e dos muros existentes así como un desmonte do terreo para a formación de explanación e muros de contención; a execución do novo lavadoiro e fonte; a instalación de fontanería, saneamento, pluviais e alumeado e a pavimentación de toda a contorna do lavadoiro e parque infantil.
A actuación completarase coa recolocación dos contedores, a plantación de novas árbores e instalación de mobiliario urbano como bancos, papeleiras, postes de protección (bolardos), farois ou varandas para a humanización do espazo e lograr unha zona de ocio para a veciñanza.
