O Bloque Nacionalista Galego de Boiro convocou, un ano máis, o acto político do Día de Galiza Mártir, que vén celebrando de maneira ininterrompida dende hai 23 anos. A cita foi este domingo 17 de agosto, ás 20:30 horas na rotonda de Cimadevila, e servirá, en palabras da agrupación, “para manter viva a memoria de quen entregaron a súa vida en defensa da democracia, da liberdade e dos dereitos do noso pobo”.
Desta volta rendeuse tributo a José Casais García, veciño de Mosquete, parroquia de Santa Baia de Boiro. Mariñeiro de profesión, no ano 1936 tiña 34 anos e estaba enrolado no vapor Alfonso Senra, adicado ao transporte de froitas e produtos agrícolas. Na súa derradeira viaxe, cubría a ruta entre Málaga e Xixón. A tripulación levaba meses sen cobrar, feito que o capitán utilizou para acusar os mariñeiros de desobediencia.
O 11 de setembro de 1936, o barco foi apresado por dous bous artillados, Argos e Ciriza, e conducido á base naval de Ferrol. Cinco días despois, e sen escoitar a versión dos tripulantes, o auditor Rendueles redactou un informe acusándoos falsamente de marxistas e de querer entregar a carga á Fronte Popular de Málaga.
A condena foi inmediata: fusilamento na noite do 17 de setembro en Canido, sen xuízo nin probas. Tras a execución, rexistráronse os cadáveres e incautáronse 2.500 pesetas, sendo enterrados nunha fosa común.
Xunto a José Casais foron asasinados outros dous veciños do Barbanza: Antonio González Pérez, de Palmeira, e José Lijó Pérez, de Ribeira. O Alfonso Senra foi posteriormente utilizado polos fascistas para trasladar prisioneiros á illa de San Simón.
En 1962, sobre a fosa construíuse un instituto. Os restos foron trasladados ao cemiterio de Catabois sen aviso ás familias.
No acto celebrado este domingo lembrouse unha cita de Eduardo Blanco Amor: “Non podemos deixar morrer os nosos mortos”. Por iso,
dende o BNG de Boiro consideran “un deber político e moral que o seu nome figure entre os bos e xenerosos do noso concello, para que nunca se perda a memoria”.
