Unha pasaxeira do cruceiro Disney Fantasy tivo que ser evacuada de urxencia este xoves cando a embarcación se atopaba a unhas 25 millas náuticas fronte ao municipio coruñés de Porto do Son.
O operativo de evacuación foi coordinado polos servizos de salvamento marítimo, que desprazaron medios ata o punto no que navegaba o buque para trasladar á muller a terra firme e que puidese recibir atención médica. A evacuación médica realizouse polo helicóptero Helimer 402.
O Disney Fantasy, pertencente á navieira Disney Cruise Line, realizaba a súa travesía cando se produciu a emerxencia sanitaria, que obrigou a activar o protocolo de asistencia rápida. Non transcenderon polo momento máis detalles sobre o estado de saúde da pasaxeira nin sobre a súa identidade.
