Co remate de xullo completouse en Noia a instalación dun sistema enerxético de aerotermia no Pavillón Agustín Mourís. O obxectivo desta actuación foi, en palabras do Concello, mellorar o sistema de subministración de auga quente, aumentar a capacidade de almacenamento e reducir o consumo enerxético. “E todo isto”, comentou o alcalde Santiago Freire, “cun claro obxectivo: gañar en eficiencia e sustentabilidade”.
O investimento supera os 55.000 €.
“Trátase dunha aposta decidida por modernizar as instalacións deportivas de Noia e coidar do noso medio ambiente”, sinalou o rexedor.
Os sistemas de aerotermia funcionan do seguinte xeito: extraendo calor do aire exterior para climatizar o interior do recinto, reducindo o consumo, as emisións de dióxido de carbono (CO2) e permitindo un aforro de até o 60% de custes.
