O tempo comezará a empeorar este xoves debido a un incremento progresivo da inestabilidade atmosférica. A xornada arrancará con néboas no interior e brétemas costeiras, que poderán ser máis persistentes en puntos do litoral.
Co avance do día, agárdase un aumento das nubes de evolución, especialmente durante a tarde, que poderían derivar en chuvascos de carácter tormentoso, sobre todo nas zonas do interior da comunidade.
En canto ás temperaturas, as mínimas experimentarán un lixeiro ascenso, mentres que as máximas sufrirán un moderado descenso, máis notable na metade oeste de Galicia. O vento soprará frouxo e de dirección variable ao longo da xornada.
O noso mar:Vento variable á mañá e á noite e do oeste á tarde, forza 1 a 2 á mañá e á noite e 1 a 3 á tarde. Mar rizado á mañá e á noite e mar ovellado á tarde. Visibilidade mala á mañá e á noite e regular á tarde. Mar de fondo do norte á mañá e noroeste á tarde e á noite, con ondas de 0 a 1 metros.
