O Concello de Rianxo acolleu a semana pasada a presentación dunha nova edición do Festival Noites de Jazz, organizado dende o Concello coa colaboración da Deputación da Coruña: unha nova entrega que botará a andar o vindeiro martes 29 de xullo co concerto da Big Band da Escola de Música de Rianxo e desenvolverase ata o 1 de agosto con concertos todos os días e diferentes propostas formativas.
O programa, moi diverso e moi envorcado na formación, arrincou xa en febreiro coa primeira actividade do festival: unha jam session no paseo da Ribeira de Rianxo coa colaboración da EMR e a Cafetería Castelao. O 1 de xullo celebrouse outra sesión en A Lareira co combo da EMR dirixido por Bernal Muíños.
Ademais, leváronse a cabo tres concertos didácticos en colexios de Rianxo, impartidos por Alfredo Susavila (piano) e Bernal Muíños (saxo), introducindo ao alumnado nos estilos do jazz mediante estándares clásicos e reinterpretacións participativas como A Rianxeira.
Por outra banda, o festival veu en xullo cun Curso de Big Band, impartido durante todo o mes na Escola de Música de Rianxo incluíndo materias como historia do jazz, teoría aplicada, técnicas instrumentais, improvisación e repertorio. Culminará co concerto de clausura o 29 de xullo, que abrirá o festival.
Lembrar tamén, no capítulo formativo, que do 26 ao 30 de xullo Francisco Muñiz impartirá un curso de baile de swing no Cuartel Vello. Rematará cun baile social de clausura o 2 de agosto na praza Rafael Dieste.
Concertos – praza de Rafael Dieste – 22.00 h
29 de xullo: Big Band da EMR.
30 de xullo: Pablo Sanmamed Trio + Benxamín Otero, galardoados co Premio Martín Códax 2024.
31 de xullo: Swing Titáns, homenaxe á época dourada do swing.
1 de agosto: Sumrrá, trío galego máis internacional, celebra o seu 25 aniversario cun repertorio dos seus mellores temas.
Podemos consultar todo o programa na páxina web do Concello de Rianxo.
