A Consellería de Educación, Ciencia, FP e Universidades anunciou o peche de sete escolas unitarias en Galicia de cara ao curso 2025/26, debido a que non alcanzan os cinco alumnos matriculados, o número mínimo esixido para manter a súa actividade. Entre as que se pechan están as do colexio de Seráns (tres nenos) e a de Queiruga( cun neno), en Porto do Son.
Estas unidades, repartidas por distintas zonas rurais, verán interrompida a súa continuidade académica por mor do descenso demográfico e da baixa natalidade, que afecta especialmente ao ámbito educativo en pequenas localidades.
A decisión responde, segundo a administración autonómica, á necesidade de garantir unha educación de calidade e unha adecuada distribución dos recursos, asegurando que os nenos e nenas poidan integrarse noutros centros con máis alumnado, profesorado especializado e servizos complementarios.
As familias afectadas serán reubicadas noutros colexios da contorna, nos que a Xunta garante prazas, transporte escolar e apoio para facilitar a transición do alumnado.
